Më datë 11 tetor 2018, në kuadrin e nxitjes së bashkëpunimit ndëruniversitar, u zhvillua në Universitetin e Shkodrës “Luigj Gurakuqi” një takim ndërmjet Ambasadores së Francës në Shqipëri, znj.Christina Vasak dhe Rektorit të Universitetit të Shkodrës prof.dr.Adem Bekteshi. Zonja ambasadore ishte e shoqëruar nga znj.Rose-Anne Bisiaux, këshilltare e Shërbimit për bashkëpunim dhe veprimtari kulturore, z.Paul Souligoux, atashe i Bashkëpunimit për gjuhën frënge dhe znj.Kleopatra Koleka, nëpunëse e zyrës.
Në fokus ishte nxitja dhe thellimi i bashkëpunimit mes Universitetit të Shkodrës dhe universiteteve franceze, më specifikisht me Universitetin Haute Alsace ne Moulhouse.
Rektori i Universitetit të Shkodrës duke i falënderuar të pranishmit për pjesëmarrjen, vlerësoi mbështetjen e dhënë në vite nga ambasada franceze. Duke vënë në dukje faktin që edhe pse është rritur numri i studentëve që janë regjistruar në kursin e gjuhës frënge nga studentët e degëve të tjera në universitet, programi i studimit të gjuhës frënge nuk është shumë i motivuar. Për këtë arsye, lind nevoja e një riformimi të programit të studimit në fakultet, ku studentët të mund të motivohen duke u diplomuar jo vetëm në gjuhën frënge, por edhe të ndonjë profesioni apo lënde tjetër të kombinuar. Një rëndësi të veçantë ka edhe aleanca franceze në Shkodër, e cila funksionon edhe si zyrë informacioni për studime të larta në Francë.
Ashtu siç theksoi edhe znj.Rose-Anne Bisiaux, ambasada e Francës do të ndihmojë dhe do të mbështesë në bisedime konkrete bashkëpunimin ndëruniversitar. Gjithashtu, z.Paul Souligoux, ndër të tjera theksoi se konteksti i gjuhës frënge në Shkodër në sistemin 9-vjeçar dhe në gjimnaze me bazë seksionin dygjuhësh frankofon është i mirë. Duke vlerësuar kompetencat e gjuhës frënge, ai vuri në dukje faktin se programi i studimit të gjuhës frënge s’duhet të mbetet vetëm në mësimin e gjuhës, por duhet të përfaqësojë një sërë profesionesh. Për këtë, ambasada përpiqet të ndihmojë për didaktikë dhe mësimdhënie.
Rektori cilësoi se Universiteti i Shkodrës tashmë ka filluar integrimin në sistemin EU të Arsimit të Lartë për pedagogë dhe studentë. Ndaj, do të ishte me mjaft prioritet që një bashkëpunim i tillë të zhvillohet edhe me universitetet franceze. Mobiliteti i studentëve, i stafit akademik si dhe administrativ, do të sillte frymën e një bashkëpunimi të ardhshëm të suksesshëm në kuadër të rritjes dhe zhvillimit të arsimit. Për këtë duhet të shfrytëzohen dhe programet evropiane si Earsmus +.